Aumingja kisa

Þátttakendur sitja í hring á gólfinu. Einn er í miðjunni og er kisan.

Kisa á að skríða, á fjórum fótum, að einhverjum í hringnum, nudda sér upp við hann og mjálma. Sá sem kisa er að nudda sér upp við á að klappa á bakið á henni og segja; „Aumingja kisa“. En—–hann má ekki fara að hlæja, ekki einu sinni brosa. En allir hinir í hringnum mega hlæja eins mikið og þeim sýnist. Kisa má endurtaka leikinn þrisvar sinnum við sama þáttakandann. Ef honum stekkur ekki bros á vör verður hún að reyna við einhvern annan. Sá sem fer að hlæja verður kisa og fer inn í hringinn.

Góða skemmtun!

Ein kona fram fyrir ekkjumann

Best er að þátttakendur séu ekki færri en tíu og þarf fjöldi þeirra að standa á oddatölu (9-11-13-15-o.s.frv.) Tveir eru um hvern stól annar situr á honum en hinn stendur fyrir aftan stólinn.

Staki þátttakandinn er ekkjumaðurinn (hvort sem það er strákur eða stelpa). Hann stendur fyrir aftan stólinn. Þeir sem sitja á stólunum eru konur og eiga að horfa á ekkjumanninn. Karlarnir standa fyrir aftan stólana og eiga að passa að konurnar sleppi ekki frá þeim. Karlarnir mega ekki horfa upp, eiga að horfa beint niður á konuna sína. Ekkjumaðurinn á nú að reyna að blikka einhverja konuna til sín. Konurnar eiga að reyna að komast til ekkjumannsins.

Takist „eiginmanninum“ að klukka konuna sína kemst hún ekki í burtu. En…eiginmaðurinn má ekki hlaupa á eftir henni. Hann verður að standa kyrr á sínum stað. Sleppi konan er eiginmaðurinn orðinn ekkjumaður og verður að reyna að blikka til sín aðra konu.

Góða skemmtun!

Eldur og brennisteinn

Þessi leikur hentar vel fyrir stóran hóp (minnst ca.10). Byrjið á að útbúa miða með númerum sem ná jafnhátt og þátttakendur eru margir. Séu þeir t.d. 17 eru númerin frá einum og upp í 17. Brjótið miðana saman þannig að númerin sjáist ekki og setjið þá í lítið ílát. Stólum er raðað í hring, einum færri en þátttakendur eru. Allir setjast á stólana nema einn, en hann stendur inni í miðjum hringnum. Sá sem er í miðjunni lætur nú alla draga einn miða úr ílátinu og sjálfur fær hann síðasta miðann. Passið að aðrir sjái ekki númerin ykkar.

Nú á sá sem er inni í hringnum að nefna tvö númer (athugið að allir viti hvaða númer er hæst). Þá eiga þeir sem eiga þessi tvö númer að skipta um sæti, en sá sem er í miðjunni reynir að ná öðrum þeirra. Það má ekki fara til baka í gamla sætið. Ef miðjumaðurinn er orðinn þreyttur á að vera inn í getur hann sagt; „Eldur og brennisteinn“. Þá eiga allir að skipta um sæti.

Önnur útgáfa af þessum leik er „Blandaðir ávextir“. Þá eru valdar fjórar til sex ávaxtategundir (eftir því hvað margir eru í leiknum) og nöfn þeirra skrifuð á miðana í stað númeranna. Þegar miðjumaðurinn segir t.d. „appelsínur“ þá eiga allar appelsínur að skipta um sæti o.s.frv. Þegar allir eiga að skipta um sæti er sagt „Blandaðir ávextir“.

Góða skemmtun!

Flöskustútur

Það sem þarf til er ein tóm hálfslíters gosdrykkjaflaska.
Allir sitja í hring á gólfinu nema einn sem er inni í hringnum. Hann snýr nú flöskunni og segir: „Sá sem flöskustútur lendir á á að syngja Gamli Nói“. Svo snýr hann flöskunni og sá sem flöskustúturinn lendir á á þá að syngja lagið. Þegar hann er búinn að því fer hann inn í hringinn og endurtekur leikinn. Auðvitað getur sá sem er inni í hringnum fundið upp á hverju sem er til að láta hinn gera. En þið verðið bara að muna að verður að vera eitthvað sem allir geta gert.

Góða skemmtun!

Frost

Til að leika þennan leik þarf að hafa einhverskonar hristu eða trommu. Það getur verið plastskál og sleif eða eitthvað sem að hringlar í. Einn stjórnar leiknum og slær á trommuna eða hristir hringluna. Á meðan hann gerir það labba allir um gólfið eins og tröllkarlar. En allt í einu stoppar sá sem trommar og þá eiga allir að frjósa í þeim stellingum sem þeir eru í. Trommarinn velur þann sem honum finnst flottastur og er sá næsti trommari.

Góða skemmtun!

Frúin í Hamborg

Þetta er orðaleikur með tveimur þátttakendum. Sá sem byrjar segir:

„Hvað keyptirðu fyrir peningana sem frúin í Hamborg gaf þér í gær. Þú mátt ekki segja svart og ekki hvítt, ekki já og ekki nei.“

Hinn finnur eitthvað upp sem hann þykist hafa keypt og síðan tala þátttakendurnir saman um það og spyrjandinn reynir að fá hinn til að segja bannorðin því þá er hann búinn að vinna leikinn.

Þegar leikurinn er orðinn of léttur má bæta við bannorðum, t.d.  „það“ – ÞAÐ er mjög erfitt að nota aldrei ÞAÐ orð í leiknum.

Góða skemmtun!

Hlutur í húfunni

Allir þátttakendur setja einhvern hlut í húfu. Einn tekur að sér að stjórna leiknum. Hann er með húfuna og tekur alltaf einn hlut úr henni í einu. Áður en hann dregur upp hlutinn byrjar hann á því að segja hvað sá á að gera sem á hann. Muna að hafa það eitthvað létt, t.d. að hoppa á öðrum fæti, syngja lag, kyssa kónginn eða bara eitthvað sem er vel framkvæmanlegt. Þegar fyrsti maður er búinn að leysa sína þraut segir hann til um hvað næsti maður á að gera o.s.frv.

Góða skemmtun!

Hver stal kökunni

Þetta er samtalsleikur: Þátttakendur, sem eru númeraðir í byrjun, sitja í hring og klappa, til skiptis á hné sér og svo lófum saman (byrja á hné). Einn er fenginn til að byrja leikinn. Menn verða að halda taktinn allan tímann, ef þeir ruglast eru þeir úr. Hinir sem eftir eru verða líka að fylgjast með því hvaða númer detta út, því ef þeir nefna númer einhvers sem er úr, eru þeir sjálfir úr leik.

Allir byrja: „Hver stal kökunni úr krúsinni í gær?“
Byrjandinn eða sá sem datt síðast úr: „Númer þrjú stal kökunni úr krúsinni í gær“
Númer þrjú svarar: „Ha ég?“
Hópurinn: „Já, þú“,
Númer þrjú: „ekki satt“,
Hópurinn: „Hver þá?“
Númer þrjú: „Númer tíu stal kökunni úr krúsinni í gær.“…………..

Og þannig heldur leikurinn áfram. Þegar fáir eru eftir er hert á taktinum, og þarf þá sjaldan að bíða lengi eftir sigurvegaranum.

Góða skemmtun!

Landaparís

Sjór loft og land

Þátttakendur sitja í hring á gólfinu. Einn er inni í hringnum og situr líka eða liggur á hnjánum. Hann á að benda á einhvern og segja eitt af þrennu, sjór, loft eða land, um leið og hann bendir. Ef hann segir sjór á sá sem hann bendir á að nefna eitthvað dýr sem lifir í sjónum. En það verður að vera nafn á dýri (Það má t.d.ekki segja „fiskur“, heldur ýsa eða þorskur eða önnur fiskanöfn). Sama gildir um önnur dýr í sjónum (hvalir, skeldýr o.s.frv.). Segi miðjumaðurinn loft á að nefna dýr sem fljúga (muna: ekki fugl heldur lóa, spói o.s.frv.) Og ef miðjumaðurinn segir land á að nefna dýr sem lifir á landi.

Þið getið sett tímamörk á þann sem bent er á ef þið viljið, t.d. að hann verði að vera búinn að svara áður en þið teljið upp að fimm eða tíu. En það verður að ákveða áður en leikurinn byrjar.

Geti viðkomandi ekki nefnt neitt dýr lendir hann inni í hringnum, en annars verður spyrjandinn að reyna við einhvern annan.

Góða skemmtun!

Skip mitt er komið að landi

Þetta er samtalsleikur fyrir tvær persónur sem við köllum hér nr.1 og nr.2. Í upphafi leiks segja þær:

1) „Skip mitt er komið að landi.“
2) „Hvað hefur það að færa?“
1) „Þrjá unga sveina.“ (eða meyjar ef viðmælandi er karlkyns)
2) „Hvernig voru þeir í hátt?“
1) „Sá fyrsti, þegar ég síðast sá hann, var hár, ljóshærður, bláeygður, í brúnum rifflaflauelsbuxum og í hvítum bol. Sá annar þegar ég síðast sá hann var…“

og þannig heldur nr.1 áfram og lýsir einhverjum þremur karlkyns-persónum sem viðmælandi þekkir örugglega). Og svo endar hann á að segja: „Hverjum viltu lifa og deyja með, hverjum viltu ganga með og hverjum viltu kasta?“ Þá verður nr. 2 að gera upp hug sinn og svara spurningunni.

Góða skemmtun!

Skipaorusta

Skipaorusta er tveggja manna spil. Hvor keppandi fær svona blað (sem þú getur prentað út hér). Útlit og fjölda skipa hvors leikmanns má sjá hér á myndinni til hliðar. Byrjið með að teikna eigin skip í aðra töfluna en athugið að þau mega ekki snertast. Hin taflan er svo hægt sé að merkja inn hvar skip andstæðingsins liggja. Markmiðið er að sökkva skipum andstæðingsins. Það gerið þið með því að nefna til skiptis reiti. Ef annar segir t.d. „E-5″ þá skoðar mótspilarinn hvort eitthvað er í þeim reit hjá sér. Ef skip sem hann er með liggur gegnum þann reit segir hann; „Þú hefur laskað ……skip“ (nefnir skipið sem er laskað/skemmt, t.d beitiskip). Spyrjandinn setur þá X í E-5-reitinn hjá sér á tóma borðinu. Ef ekkert er í reitnum sem hann nefnir setur hann punkt í reitinn til að sýna að reiturinn sé tómur. Þannig finnur hann smátt og smátt út hvernig skipið snýr og sekkur því að lokum. Sami keppandi spyr aldrei tvisvar í röð. Setjið punkta umhverfis skip sem hefur verið sökkt svo að þið nefnið ekki þá reiti og munið þá að skip mega aldrei snertast. Góða skemmtun!

Spurningaleikur

Í þessum leik geta allt frá tveimur til ótakmarkaðs fjölda tekið þátt.Einn þátttakenda hugsar sér einhvern ákveðinn hlut eða hugtak. Hinn eða hinir spyrja þannig spurninga að alltaf sé hægt að svara annaðhvort já eða nei. Skemmtilegast er að skipta spyrjendum í tvö lið sem spyrja til skiptis. Við hvert já sem liðið fær, fær það stig og vinnur þá liðið sem hefur fleiri stig í lokin. Þið getið líka sjálf búið til einhverjar öðruvísi reglur og það er líka skemmtilegt að fara í þennan leik þó leikmenn séu bara tveir.

Góðar spurningar eru t.d. Er þetta hlutur? Er þetta hugtak? Einnig að byrja á því að komast að því hvort hluturinn (ef það er hlutur) sé í steinaríkinu, jurtaríkinu eða dýraríkinu.

Til hluta telst allt sem er áþreifanlegt, lifandi eða dautt, en hugtök eru óáþreifanleg. Esjan mundi t.d. teljast til hluta þó hún sé heilt fjall, en andrúms-loftið væri hugtak. Ritgerðin hennar Siggu um sólina er hugtak en bókin sem hún skrifaði hana í er hlutur.

Góða skemmtun!

Stólaleikur

Raðið stólum í tvær raðir sem snúa stólbökunum saman. Stólarnir eiga að vera einum færri en þátttakendur. Allir raða sér í hring í kringum stólana en mega aldrei snerta þá með höndunum. Nú spilar einhver á hljóðfæri eða spilar tónlist í hljómtæki. Þá eiga allir að ganga af stað í kringum stólana, réttsælis. Eftir smástund þagnar tónlistin og þá eiga allir að setjast, en einn verður auðvitað útundan því stólarnir voru einum færri en þátttakendur. Sá sem er úr tekur einn stól úr röðinni um leið og tónlistin byrjar aftur og halarófan gengur af stað. Þannig er alltaf einn úr í hvert skipti sem tónlistin þagnar.

Góða skemmtun!

Yatsy

Þennan leik þekkja nú flestir en ég læt hann samt fljóta með hér.

Til þess að leika hann þurfið þið fimm teninga og yatsy-blokk. Þið getið líka teiknað upp þessa töflu á blað eða prentað hana út.
Hver keppandi má kasta teningunum þrisvar í hverri umferð. Eftir hvert kast velur hann úr þá teninga sem hann vill halda og skilur eins marga teninga eftir á borðinu og hann vill.

Fyrir ofan miðjustrik gildir að fá sem flesta teninga með réttri tölu í hverri línu.
Til þess að fá bónus/verðlaun (50) fyrir 6 fyrstu reitina þurfið þið að fá samtals 63 út úr þeim (eða minnst 3 teninga með réttri tölu undir hverri línu fyrir ofan strik). Teljið aðeins með teninga með réttri tölu.
Eitt par eru tveir eins teningar.
Tvö pör eru tveir teningar sýna sömu tölu og einhverja aðra tölu á tvo teninga.
Þrír eins eru þrír eins teningar.
Fjórir eins eru fjórir eins teningar. 
Lítil röð er 1-2-3-4-5.
Stór röð er 2-3-4-5-6. 
Fullt hús er þegar viðkomandi fær sömu tölu á þrjá teninga og einhverja aðra tölu á hina tvo (3+2).
Áhætta eru sú summa sem allir teningarnir á borðinu gefa, en þessi lína er oft nýtt þegar teningarnir bjóða ekki upp á annan valkost.
Yatsy er erfiðast en þá þarf að fá sömu tölu á alla teninga. Hins vegar skiptir engu hvort það er 1 eða 6, þú færð alltaf 50 fyrir Yatsy. Í öllum öðrum tilfellum leggið þið saman punktana á öllum teningunum.

Í lokin eru tölurnar frá og með samtalsreitnum fyrir ofan bónusinn lagðar saman til að fá heildarsamtölu í lokin. Sá sem er með flest stig í lokin vinnur.

Góða skemmtun!