Þrándheimsblót 

Samið fyrir landana í Þrándheimi.
Lag: Það er svo margt ef að er gáð. 

Á þorrablót í Þrándheimi 
nú þekkir landar fara. 
Þeir hrútspunga og hangikjöt
og harðfisk aldrei spara. 

 Trog skulu tæmast 
það trútt er okkur sæmast. 
Nú lifna gleðilæti 
og kæti. 

Og nú skal verða feikna fjör 
og fyllast allir magar, 
þótt deila megi eflaust um 
hvort útlitið það lagar. 

En hver er að hugsa’ um  
hrellingar í buxum. 
Bara þorrann blótum, 
þess njótum. 

Við kæstan hákarl kætast menn 
og kneyfa brennivínið. 
Nú drykkjuhreysti okkar enn 
þið Íslendingar sýnið. 

Sáttir nú syngjum 
saman glösum klingjum. 
Dansinn látum duna 
af funa. 

Við skulum okkur skemmta´í nótt 
og skunda´í ræl og valsinn 
svo út um bæinn, íslensk drótt, 
nú undirtaki galsinn. 

Og fyrir öllum 
Íslendingum snjöllum 
með sannri gleði´í sálum 
nú skálum. 

Samið í byrjun árs 1996 þegar dóttir og tengdasonur Margrétar voru í þorrablótsnefnd Íslendingafélagsins Kjartans í Þrándheimi.