Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Breiðfirðingavísur
Gyllir sjóinn sunna rík,
sveipast ró um Faxavík.
Esjan glóir, gulli lík,
gleði bjó mér fegurð slík.
Samt ég allra svásast finn
sólarfall við jökulinn;
vermist mjallar vangi þinn,
vesturfjalla kóngurinn.
Breiða- fyrst í firðinum
fékk ég vist á bátunum
hjá aflaþyrstum, þrekmiklum
þrauta og lista formönnum.
Öllum stundum starfsamar
styrkum mundum konurnar
ýttu á sundin áramar,
öxluðu’ og bundu sáturnar.
Hyldu ísar hafflötinn,
hætti’að lýsa dagurinn,
ljóðadísin leit þá inn,
lagaði vísur hugurinn.
Hver sér réði rökkrum í
rétt á meðan áttum frí;
þá var kveðið kútinn í,
kviknaði gleði oft af því.
Vetrar löngu vökurnar
vóru öngum þungbærar,
við ljóðasöng og sögurnar
söfnuðust föngin unaðar.
Ólína Andrésdóttir