Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Söknuður
Nú haustar að á heiðum
og húmar í skóg.
Hver söngfugl í dalnum
til sóllanda fló.
En ein sit ég eftir
um andvökunótt
og harma það að sumarið
er horfið svona fljótt.
Þú komst eins og vorið
með sól og söng og blóm.
Um dali fór hafræna
við hörpu þinnar óm.
Og veslings litla hjartað mitt
í hræðslu að þér dróst.
Það ætlaði að flýja þig
og faldi sig – við þitt brjóst.
Og hönd þín snart strenginn.
Harpan skalf af fró.
Gleði allrar veraldar
við hug mínum hló.
Mér fannst ég hafa sofið
og syrgði það eitt
hve seint ég hafði vaknað
- og vissi ekki neitt.
Við rökkur þinna söngva
leið sumarið hjá.
Svo hvarfstu mér, vinur,
og haustið lagðist á.
En hvenær sem hafræna
heim í dalinn fer,
frá kynjalöndum fjarlægum
hún kveðju til mín ber.
En ég hef beðið lindina,
sem líður mér um kinn,
að flýta sér til hafsins
og finna ástvin minn.
Og spyrji hann síðan
hver sendi hana af stað,
þá fær hún honum aðeins
þetta fölnaða blað.
Þá grípur hann strenginn
og grætur sáran við.
Tár hans verða að hljómum
í hörpunnar klið.
Og ómarnir svífa
af sænum til lands.
Með bergmálum fjallanna
flýg ég svo til hans.
Tómas Guðmundsson