Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Eitt er hið æðsta
Eitt er hið æðsta allra boðorðanna,
helgasta, hæsta: Hjartans elskan sanna.
Ekkert annað sýnir eins þig Guðs vin sannan.
Elskið hver annan.
Krists orð oss kynna: Kærleik mest sá hefur,
sem vegna sinna sig í dauðann gefur.
Ekkert eins vel sýnir ást og kærleik sannan.
Elskið hver annan.
Bróðir vor blíði besta dæmi léði,
lét fyrir lýði líf með fúsu geði.
Ekkert annað sýnir eins hans kærleik sannan.
Elskið hver annan.
Viljir þú vera vinur Guðs og manna,
gott ber að gera, gæta boðorðanna.
Ekkert annað sýnir eins þinn kærleik sannan.
Elskið hver annan.
Vinir þá verið, vægið, líknið, blessið,
byrðar hins berið, bjargið, svalið, hressið.
Ekkert eins vel sýnir yðar kærleik sannan.
Elskið hver annan.
Valdimar Briem