Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Kútter Lars
Kútter Lars var lekahrip
og nú er hann sokkinn.
En annars var hann ágætt skip
og nú er hann semsé sokkinn.
Á seglum hans voru hundrað göt
og nú er hann sokkinn.
Og sum voru gömul sængurföt
og nú er hann semsé sokkinn.
Og hátt hann sigldi um hafið blátt
og nú er hann sokkinn.
En aldrei reyndar í rétta átt
og nú er hann semsé sokkinn.
Hann rak stundum alveg út á mið
og nú er hann sokkinn.
En þar hélst þá enginn þorskur við
og nú er hann semsé sokkinn.
Og þegar hvessti þoldi’ hann allt
og nú er hann sokkinn.
Og stundum heilan hring hann valt
og nú er hann semsé sokkinn.
Og alltaf sótti hann upp í land
og nú er hann sokkinn.
Og sjö sinnum hann sigldi í strand
og nú er hann semsé sokkinn.
Jónas Árnason