Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Sól, sól skín á mig
Sól, sól skín á mig,
ský, ský burt með þig.
Gott er í sólinni að gleðja sig,
sól, sól skín á mig.
Sólin er risin, sumar í blænum,
sveitirnar klæðast nú feldinum grænum.
Ómar allt lífið af ylríkum söng,
unaðsbjörtu dægrin löng.
sól, sól...
Blómbrekkur skrautlegar iðandi anga,
andblærinn gælir við marglita vanga.
Ómar allt lífið af ylríkum söng,
unaðsbjörtu dægrin löng.
sól, sól...
Leikandi skarinn af ánægju iðar,
áin til samlætis glitrar og niðar.
Ómar allt lífið af ylríkum söng,
unaðsbjörtu dægrin löng.
sól, sól...
Blómkrónur skínandi blöðum úr slétta,
bikar sinn fullan af hunangi rétta.
Ómar allt lífið af ylríkum söng,
unaðsbjörtu dægrin löng.
sól, sól...
Finnst mér nú tilveran órofa eining,
úrelt sú kenning um mismun og greining.
Ómar allt lífið af ylríkum söng,
unaðsbjörtu dægrin löng.
sól, sól...
Sveinbjörn Einarsson og Magnús Pétursson