Söngtextasafn
Það má segja að söngtextar hafi verið ær og kýr Margrétar. Fyrir utan að búa til eigin texta safnaði hún saman miklum fjölda texta eftir aðra höfunda sem hún birti á vefnum sínum og varð safnið fljótt vinsælt til uppflettinga. Textarnir endurspegla vel hversu fjölbreyttan smekk Margrét hafði á tónlist, allt frá barnagælum og trúarkvæðum til gamalla dægurlaga og nýrri. Safnið hennar er hér birt nánast óbreytt eins og það var þegar Margrét hætti að uppfæra vefinn sinn í kring um 2015. Höfunda er getið eins og hægt er og eru ábendingar um höfunda þar sem þá vantar vel þegnar og eins ef textar eru hér birtir í óþökk höfunda þeirra.
Dægurlagasöngkonan Margrét
Hagavagninn
Stúlkan mín á heima vestur í Högum
hún er í búð við Laugaveg.
Miðdepill í ótal ástarsögum
enginn veit það betur en ég.
Baby-doll hún selur og nælonsokka
og sjálf um nætur klæðist í.
Í rauðu hári hefur hún hvíta lokka
og hún er sæt í bikiní.
Mig dreymir hennar þýða yndisþokka,
þegar ég er háttaður.
Hún er óræð eins og myndirnar á Mokka
svo maður verður gáttaður.
Með fagursveigða vör sem Venusboga
og vöxtur svona la, la, la.
Sem götuvitar grænu augun loga
og göngulagið cha, cha, cha.
Og næfurþunnum náttkjólum hún klæðist
svo næstum sést þar allt í gegn.
Til hennar hverja nótt minn hugur læðist
því einlífið er mér um megn.
Með henni er ég alltaf einhvern veginn
óstyrkur og skortir magn.
Hana sæll ég leiði inn Laugaveginn
við laumumst inn í Hagavagn.
Ég stundum fæ að faðma hana á kveldin
uns fer hún í sitt baby-doll.
En samt til þess að sefa ástareldinn
ég syng við hana í dúr og moll.
Og þótt mig stundum langi að vera lengur
slíkt leyfist ekki að tala um.
Hún segir alltaf : „Ertu vitlaus drengur,
þú ert að missa af vagninum“.
Með Hagavagni held ég burtu síðan,
já held þá í mitt kalda ból.
Mig dreymir hennar yndisþokka þýðan
og þennan gegnumsæja kjól.
En sú er von, að seinna þetta breytist
við baby-doll og brúðarkoss.
Þá um nótt hjá henni að vera veitist
og vagninn ekkert hrellir oss.
Jónas Jónasson